منتدى شبكة جهينه نت - ثقافة مكاويييييييييييية اصل ....

منتدى شبكة جهينه نت (http://www.johina.net/vb/index.php)

- منتدى المائده والمطبخ (http://www.johina.net/vb/f37.html)

- - ثقافة مكاويييييييييييية اصل .... (http://www.johina.net/vb/t31124.html)

ثقافة مكاويييييييييييية اصل ....

الأكلات المكية لها طعم ونكهة ونشأة
واللي تحلي الأكلات وتطعمها زيادة إنو لكل أكلة مناسبة تتعلق بيها
وما ناكلها إلا في المناسبة حقتها

هم كدة المكاوية وبالزات العتقية القدم لهم تصانيف وتباتيك في الاكل والشرب مايعلم بيها الا الله عز وجل
ماشية معاهم من أيام ما فنو الأوادم

أقروا الموضوع وبعدين قولوا رأيكم عن هادي العادات

الأكلات المكية ترتبط بعادات ومناسبات يعني كل اكلة ولها مناسبة زي أيش ؟؟؟

هيا خدو عندكم ....

1/الرز البحمبص والسقط والمعرق أو المختوم والششني هادي الأكلات خاصة بالعزا وزيادة في التوضيح
اليوم الأول والتاني والتالت يطبخو الرز البحمبص واليوم التالت اللي يسموه قطع العزا يسوو الششني والمعرق والمختوم والسقط

2/الكابلي أو الزربيان والسمبوسك والطورمبة هادي يسووها وقت المناسبات والأفراح للرجال
أما الحريم يجيبولهم الميز طبعا زمان أول مافي لا ميز ولا يحزنون ياكلو من نفس أكل الرجال بس يسووقليل بريك او بف بالجبنة والا باللحمة شغل بيتي يعني واللي تعرف تسوي كيك بالبرتكان او الموز تسوي صينية علشان يحلو بيها
بعدين فن علين الميز والشغلات الجديدة هادي

3/المعدوس ( الرز عدس ) هادا يسووه المكاكوة يوم الغيم والمطر ومعاه روبيان مكشن بالقوطة والبصل والفلفل الأخضر وزلطة حمر
وكيف لو كنا ساكنين في بلاد الخواجات على كدة كل يوم معدوس علين البطن تسير زي الطبلة

4/الملوخية الخضرا هادي تتعمل في اليوم الأول من السنة الهجرية الجديدة على الغدا من باب التفائل إنو ربنا يجعلها سنة خضرا وخير للجميع

5/الحليب أبو الهيل هادا برضو كمانة ينشرب في صبحية أول يوم في السنة الهجرية الجديدة

6/السليق هادا يسووه في المناسبات لمن يكون الجو باااااااااااااااااارد

7/الدبيازة معروفة على ما أعتقد للجميع يسووها للفطور أول يوم العيد

8/المعمول والغريبة يسووها في أيام الحج

9/السمك مايتاكل إلا في الشعبنة علشان في رمضان
الناس ماتاكل السمك بس هيا كدة عادة
شعبنة يعني اضرب سمك وصيادية

10/عشرة عاشورا ( 10 محرم ) رز زربيان الحلو
وزلطة لبن أبو الفلفل

11/السحلب يسووه في الأيام الباردة علشان يلم العضم ويدفي الجتة بالزات لو فيلو شوية جنزبيل

12/القهوة الملوزة اللي يحطولها لوز بجلي مهروش طبعا هادي وقت البزورة ما ينجحو والا يسقطو يسوولهم هيا قيد ماتفرق
لو البيت فيلو خمسة بزورة ناجحين وتلاتة صاقطين رايحين يلغو القهوة الملوزة

13/وغير أكلات رمضان الخشاف والماسية ومكارنة باللبن إزا تعرفوها والقطايف هادي ياكلوها من السنة للسنة

14/المجلب ( مجموعة أعشاب مخلوطة عن العطارين ) زماااااان ويمكن دحين مافي حرمة تنفس وتولد إلا يصنجوها مغراف مجلب علشان يكرت وصخ البطن والولادة وينضفها

15/ الزلابية واللقيمات ( اللنقطة ) أول ما ينقال اسمها نتزكر العيد والفطور حق العيد

16/ السلالي والمقلقل واللحم نفتكر على طول عيد الحج يندبح الطلي ومايبقى شي منو تبارك الرحمن
كل شي يتاكل فيه علين الرجول يسوو بيها مقادم والمفاصل نلعب بيها كبوش والجلد يفرشوه على عتبة البيت زي الدعاسات دحين والديل نشوح البزورة بيه زي البواكير
ههههههههههههه

زي ماشفتو الأكلات اللي قلنا عليها لها مناسبة أو وقت معين تتاكل فيه
مع انو يمدينا ناكلها طووووووووووول السنة مو مشكلة ويمكن كتير ناس هجروا
وفلتو تباتيك زمااان الا مارحم الله بس هيا زي ماتقولوا شغلة تعود

وعلى قولة المثل
الله لا يقطع العادة إلا بسلامة

ملكة الليل