ياامير جاك الشعر يشكي لك من ضروف الزمن=يشكي عليك المعظلات اللي تدن رعودها
وان ماشكى حاله على الدكتور يشكيها لمن=انت الوحيد اللي له القدره بحل عقودها
يامير ياللي لك مواقف فالخطوب وفالمحن=مواقفك تشهد لها بيض الليال وسودها
انااشهد ان اللي تزبن خالد الفيصل زبن=مطلق سراح اللي يديه مكبله بقيودها
اليوم جاك الشعر يحمل لك على كتفه كفن=ياتعالجه والا تواري جثته للحودها
كنه لفاك يقول لك يامير انا عظمي وهن=والسدره الخظراء غدا يامير يابس عودها
ويقول انا مريت في فتنه من كبار الفتن=والحال مايحتاج شرح وسومها بعضودها
باعوني الجهال بالسوق الرخيص بلا ثمن=واصبحت لعبه مع مصادير العرب وورودها
هم يحسبون اني مجرد قافيه بس ووزن=مايعلمون اني معاني محكمات بنودها
من لايعرف يقودها قود الاصيله بالرسن=اقول تكفى خلها للي يعرف يقودها
انا من اول لي بسوق عكاظ دار ولي وطن=هاذي حقيقه والحقيقه ثابتات شهودها
علاقتي كانت مع العشاق صافي يالبن=وانا كما جبال السراه النايفات حيودها
مايذب حيدي غير من في جعبته شعرا حسن=ومن جا بدون الشعر له دقه ماعاد يعودها
اللي مضى كني بحر ماتعبره غير السفن=واليوم كل الناس تعبرني باقل جهودها
اصبحت مرتع للجميع من الشمال الى اليمن=من كل صوب الناس جتني في رداها وجودها
جتني عرب جتني عجم حتى حريم الهند جن=وجميع دوله فوق سطح الارض جات وفودها
يامير مهنه صرت وانا فالحقيقه مامتهن=واهل الطمع تبغى على حسابي تبل كبودها
والحي يحيي لكن الميت يزودنا غبن=وذي كلمة تكفي عن قصار العلوم وزودها
وتراي امانه وانته اللي بالامانه مؤتمن=وشرواك والله من رجالا ماتخون عهودها
تكفى يابو بندر بعد ماهجوس قلبي لك لفن=تفكني من ناس صوبي جات تشعب ذودها