تدور الارض وتدور السوالف والسنين تدور
وانا لو اعرف الي راح مانيب اعرف الباقي

يقولون القصيد شعور والشاعر بدون شعور
و اقول الله يعاقبني اذا ماهو من اعمــــــــاقي

انا لو اكذب بشعري وقف نبض ويبس حنجور
وقادر اخسر الدنــــيا وعاجز اخسر اخلااااقي

ولاجل عنق المها والصوت الادفاء والعيون الحور
وقف عمري ولا ادري وش انا من وقفته لاقي

قسم بالله ما قبلك غياب ولا بعدك حضور
ولاكن ودي بفرقاك لو ماودك افراقي

تعاتبنا بما فيه الكفايه من ثمان اشهور
وسالت دمعتين وطاح قلب وماتت اشواقي

تعدتك المشاريه وجفاك اللوم والمستور
اذا مايكشفه صوتي كشفه الحبر بوراقي

تعبت اضحك على نفسي وابررلك واعيش الدور
وتعبت اجامل اضروفك واصدق كذبك الراقي

يكفيني اغيب وخاطري ماجاك منه قصور
ويكفيك اتذكر كل ليله لهـفة اعنـــــــــاقي

تذكر يوم اخليك اتباها كبريا وغــــــرور
يوم اني اتحدابك واخيب هقوة الهـــــــاقي

وتذكر يوم اعذرك وانت لاصادق ولامعذور
ادورلك عذر واصدقه واكذب احـــــــــداقي

وتذكر يوم جيت من الحزن متضايق ومكسور
فرشت لك الضلوع وقلتلك ياسيد عشاقي

خذ اضلوعي وبن فيها يسار الصدر بيت وسور
ترا مافيه قبلك من سكن صدري وخفاقي

وبعد هذا رحلت ولابقى الا بيتك المهجور
ولايكبرها لامن رحلت ومنزلك باقي