تركي الميزاني:

سلام الله سـلامٍ للعلـوم الطيبـة عنـوان = وأعرف معزبه والضيف في حكمة معازيبه

وأنا لي صاحبٍ ما ينطق الكلمة بلا برهـان = أبا سولف معه والعلم يدري به وانا أدري به

ألا يا مرحباً وأهلاً بقلطة شاعر المطران = تراحيب لها بالصدر تشريقـه وتغريبـه

وانا يا صاحبي ما نيب مثلك للشعر ميزان = ترفق بي ترى توي غشيم وداخلي ريبـه

تركي الميزاني:

يدوم الك البقا والطير ما يكفخ بـلا جنحـان = وانا خابرك صقر وكل صقر لـه مخاليبـه

سبحنا في البحور اللي تضم اللول والمرجان = واخذنا ما نبي والوقت ما تصفى مشاريبـه

صحيح الوقت ما يصفى وتعكير الزمان ألوان = وأشوف الخايبه تعجب وهـذه والله مصيبـه

غدى عند الهزيلة شان والجزله ثمنهـا هـان = وسيف الكذب والتهريج اشوف الناس تغزي به

أشوف اللي تشوفه طال عمرك يالله الغفران = واشوف الناس قامت تبتسم بسنون تركيبـه

لو ان اللي بنى البيت المسمى ثبت العمدان = ما شفنا الريح تلعب بين ذرياتـه واطانيبـه

يا كيف الحل والحالة سفينه ما لهـا ربـان = يمشيها الهوى من حيث مـا هبـت دواليبـه

عربها ترقص وتزفن على حس الوتر والدان = يحسبون المعاني صولها من جاب له خيبـه

أظن الحـل نتركهـا تهيـم بغبـة النسيـان = عساها من نصيب القيض لا هبت ملاهيبـه

لو أن النابغة مخطي ما عود بالرضى حسان = يكفّينا رضى حسـان والوقـت وتجاريبـه

أنا خابرك ميزاني وربعـك كلهـم شجعـان = علامك يوم عرّض لك هدفها ما تضحي بـه

ترى صمتك عن الغاوي وتصديدك عن الخوّان = عذاب للضمير الحي ولا في هرجتـك غيبـه

أنا مثلت فيك القاف ما مثلت فيـه فـلان = وطبعي كل مقفي ما الحقه واشذب عراقيبه

نبي نبعد عن المنقود والمشروه مهما كـان = ولا نفرح على المسلم ليا كثـرة عذاريبـه

خالد بن سعود:

أجل بنشدك عن فيلٍ يحب مغازل النسوان = تضيق ابه الاماكن والمداخل من لغابيبـه

يقول إلهن انا الساحر انا الباهر وانا الفنان = وهو ياكل شنق غيره وكـل داري بعيبـه

تركي الميزاني:

سمعت انه على كبره يحس بعقدة النقصان = مجند له رعاة تمدحه وتقـول يـا طيبـه

لكن الفيل يبقى فيل يوم ان الحصان حصان = وضلع طويق ما كل يبي المرقى يعدي بـه

خالد بن سعود:

ما بين ممسح الريضان وبين ملهي الرعيان = غدى ما للجزاله دور ولا لاهل السنع هيبه

الا يال الزمان الشين الا يا ضيعة الوجدان = نزل في سوق ابن قاسم وكلٍ قال كم هي به

تركي الميزاني:

من أول كنت يا هداج تيما تـروى الضميـان = لكن اليوم جمـك مـا نذوقـه مـن غثاريبـه

لا بد الوقت يكشف من هو الرابح من الخسران = وكلٍ يلتبس له ثـوب فـي قـده يصلـي بـه

أنا يعجبني الشاعر قوي الحبك والبنيان = الي منه بني بيته يشوقك فـن تقطيبـه

أجاذبه العلوم اللي تونّس والخفا ما بان = مثل تركي عساه يفوز بالمليون ويجيبه

.

المصدر

جريدة الجزيرة