ضاق الحشا مما جرى والزمن شـان = في وجه نفس غاضها مـن نشدهـا

تعبت يـا مفـرج ومليـت الاوطـان = ولا عـاد للدنيـا طعـم مـن بعدهـا

إليا طرت لي مـن تسميـك خزنـان = كن العيون غيوم وارجـف رعدهـا

جاني خبرها فـي طريقـي مسيـان = علم حرق حدب الظلـوع وحصدهـا

وعودت مع دربي بالافكـار غرقـان = اصـارع همـوم تـزايـد عـددهـا

امشي ولا ادري عن طريقي وسرحان = والشوق عبراته بصـدرى حشدهـا

اقول يمكن صاحـب العلـم غلطـان = بعض العلـوم احيـان مـا نعتمدهـا

ودخلت مذهـول وضايـق وشفقـان = للـي حنـان الكـون فيهـا وحدهـا

ام حشـى مـا تنتقـدر بالاثـمـان = يا كبر فرجتهـا علـى مـن فقدهـا

ولقيتها والصمـت تشكيـه جـدران = ما كن ربـي فـي الخلايـق وجدهـا

وكشفت عن وجه به النـور برهـان = نـوره يبشرنـي بغـايـه سعـدهـا

ها ك الجبين اللي كما البـدر لا بـان = كـم سجـدة تـال الليالـي سجدهـا

ولميتها من كـل قلبـي بالاحضـان = وقبلـت رجليهـا وقبـلـت يـدهـا

بكيتها لينـه صفـى دمـع الاعيـان = وهي بصمت ولا درت عـن ولدهـا

وانا من اول كل ما جيـت عمسـان = تدري بحالي قبـل لا أشكـي نكدهـا

ودعتها بدمـوع وآهـات واحـزان = لحظات فيها النفس محـدن حسدهـا

ومن عقبها لفوا جسدهـا بالاكفـان = مـا كنهـا الا طفلـة فـي مهـدهـا

وشلنا نعشها بيننـا فـوق الامتـان = وانـا الـذي ساويتهـا فـي لحدهـا

قبرعسى فالـه مـن المـزن هتـان = يمطـر دقاقـه مـا يجيهـا بردهـا

ما تنقطع عنـه السحايـب علشـان = يبرد ترابـه مـا يضايـق جسدهـا

حتى يجي من ظمـن روح وريحـان = جنـاة عـدن اللـي إلهـى وعدهـا

ما عاد نرجيها وكـان الـذي كـان = اقفـت لياليـهـا وقـفـا عهـدهـا

ما كن مـرت فـي مظاهيـر بـدوان = يـوم الركايـب مـا يونـي جهدهـا

ولا كنها داجـت بعشـب وريضـان = ولا شيدوا سـود البيـوت بعمدهـا

بأرض خلا ما دوجوا فيـه حضـران = فيها النصي عـذرا تلاعـب جعدهـا

ولا كنهـم وردوا عـدود وغـدران = ولا جاوروا خبرى يسفسـف زبدهـا

صفحه زمان وانطوت بيت الازمـان = راحت وكـل اللـي عرفهـا حمدهـا

رحمتـك يارحمـن ياعالـي الشـان = ياللي جميـع ذنـوب خلقـه جردهـا

إلطف بحال الوالـده وانـت رحمـن = وانـا اتحمـل كـل ذنـب ظهـدهـا

وصلوا على المبعوث للانس والجـان = ما استقبل الكعبـه وحـج وقصدهـا